Шалқарлық шенеунік әзілдеймін деп басы бәлеге қалды

Шалқарлық тағы бір шенеунік әзілдеймін деп басы дауға қалды. Бұл жолы Шалқар аудандық әділет басқармасының маманы теріс қылығы үшін жұмыстан кеткен, - деп хабарлайды Tengrinews.kz тілшісі. Бұл туралы редакцияның сауалхатына берген жауабында ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Ақтөбе облысы бойынша департаментінің баспасөз хатшысы Анар Танербергенова айтты.

Шенеунік биылғы 1 наурыз күні "Шалқарлық ТӨРТҚАРА бауырларға" атты құттықтау сөзін құжатқа жазып, оны департамент атынан мөр басып, Instagram желісінде жариялаған.

Әділет басқармасының құжаты ретінде толтырылған хатта "Нұрсұлтан Назарбаевтың 2016 жылғы 14 қаңтардағы Жарлығына сәйкес 1 наурызда ТӨРТҚАРАЛАР Күні атап өтілетіні" туралы жалған хабарлама жазылған. Шенеунік бұл "мерекенің" биыл төртінші рет атап өтілетінін жазған. 

"2019 жылдың 1 наурызында күнделікті әлеуметтік желілерде мониторинг жүргізу барысында Instagram желісінде "Шалқарлық ТӨРТҚАРА бауырларға" атты жағымсыз ақпарат жарияланғандығы анықталды (сол мезетте, Instagram желісінен "Шалқарлық ТӨРТҚАРА бауырларға" атты жағымсыз ақпарат өшірілді). Аталған дерек бойынша Ақтөбе облысы Әділет департаменті тексеріс жүргізіп, нәтижесінде Шалқар аудандық Әділет басқармасының іс жүргізушісі А.Күзембаев өз қызметтік бабын пайдаланып пакеттер үшін арналған мөрді басып, құттықтау сөз жазу арқылы дайындалған құжатты Whatsapp мессенджері арқылы таратқандығы анықталды", - делінген ведомство жауабында.

Осылайша, бұл дерек бойынша аудандық әділет басқармасының басшысы міндетін атқарушыдан түсініктеме алынып, оған 4 наурызда өзінің қызметтік міндеттерін тиісті орындамағаны үшін сөгіс жарияланған. Яғни басқарма басшысының міндетін атқарушы басқарма қызметіне тиісті бақылау жасамаған және ақпараттық қауіпсіздік тәртібін сақтамаған.

Ал құжатты толтырып, оған мөр басқан маман өз еркімен 1 наурыздан бастап қызмет орнын босатқан. Шенеуніктің басқармада 2017 жылдың 2 қарашасынан бері жұмыс істеп келгені айтылады.

Еске салайық, осыған дейін Интернетте шалқарлық тағы бір шенеунік "чики-чики" сөзімен аты шығып, коммуналдық шаруашылыққа жауапты Аян Қорқытұлын тәртіптік кеңес қызметіне толықтай сәйкес емес деп шешкен еді.