Психолог қазақстандықтардың жиі ажырасатын 5 себебін атады

Қазақстан ажырасу көрсеткіші бойынша ТМД-да көш бастап тұр. Мұндай статистиканы "Бақытты отбасы" ресурстық қолдау орталығының мамандары айтып отыр. Олардың айтуынша, ажырасуға арыз беретіндер - көбіне үйленгеніне 1 немесе 2 жыл ғана болған жас жұбайлар және оған себеп - қаржы қиындықтары мен отбасына туыстардың араласуы. Ажырасудың себептері көп. Бірақ басты себептері не деген сұраққа нақты жауап табу қиын. Осы мақсатта Tengrinews.kz тілшісі отбасы психологы Жанат Смирновамен сөйлесіп көрді. 

Психолог өз тәжірибесіне сүйене отырып, қазақстандықтардың ажырасуыңың негізгі 5 себебін атап берді.

"Маған осы мәселе бойынша көмекке келетіндердің басым бөлігі - 30-50 жастағы адамдар. Олардың ішінде әйелдер де, ерлер де бар. Осыдан жиі айтылатын себептердің бірі деп жас жұбайлардың бірінің немесе екеуінің де балалық шақта алған психикалық жарақатын айтуға болады. Яғни олар отбасы құрудың алдында бір-біріне тек қолдау көрсететін, жұбата алатын адам ретінде қарайды да, ол жарақат жазылған соң немесе балалық шақтағы проблема ұмытылған соң әрі қарай бірге өмір сүрудің мән жоқ деп ойлайды. Олар бұл жағдайда нақты сол кезде бір-біріне керек болғандықтан шаңырақ көтерген болып шығады", - дейді Смирнова.

Ал екінші себеп, психологтың айтуынша, қазақстандықтардың дұрыс таңдау жасамауы.

"Өкінішке қарай, көбі дұрыс таңдау жасамайды, бір-бірін дұрыс таңдай алмайды деуге болады. Оған нақты мысал келтірер болсақ, қазіргі таңда жігіттер қыздарға үйленуге ұсыныс жасайды да қыздар оған бірден келіседі, "жоқ" деп айтпайды да. Бүгінгі қыздар үшін кез келген ұсыныс бинго сияқты. Меніңше, бұл - жеңілтектік. Байқағаным, қазір барлығы үйленіп, тұрмысқа шығуға асығады да, қате, асығыс шешім қабылдайды", - дейді психолог. Нәтижесінде бір-бірін жете білмей, дұрыс танымай, өзінің жанына жақын адамды таңдамайды дейді.

         © vse42.com

Мамандар елімізде ажырасу жағдайларын азайтудың жолын айтты

Қазақстандықтардың ажырасуына тағы бір себеп - жұбайлар өзінің және өзі құрған отбасының мүддесін қорғай алмайды дейді маман.

"Олар өзінің және отбасының құндылығын, мүддесін қорғай алмаса, онда ол мәселеге екі тараптан отбасы мен туыстар араласады. Ал бірақ бізде көбі "отбасымызға ата-анамыз немесе туыстарымыз" араласады деп айтады. Расында олай емес, мұнда ата-аналар араласып жатқан жоқ. Керісінше, отау құрғандар өз мүдделерін қорғай алмай отыр деген сөз", - дейді Смирнова.

Ажырасуға төртінші себеп, психологтың сөзіне қарағанда, сексуалдық проблема.

"Қазір жас отбасылар арасында "сексуалдық бостандық" деген ұғым пайда болды. Бір-біріне шөп салу әдетке айналған. Адалдық құндылығын жоғалтып барады. Отбасы құндылығында шекара деген жоқ, қалағанын жасайды. Осыдан барып, кризис басталады да ажырасуға дейін барады", - дейді психолог.

Қазақстанда неше рет отбасы құруға болады

Cондай-ақ, Смирнова екінші рет отбасы құрғандар арасында ажырасу қаупі жоғары екенін айтады.

"Екінші рет некеге тұрғандар арасында ерте ме, кеш пе - қайтадан проблемалар басталады. Оған қоса, бұрынғы некеде көрген зардабы қосылады. Яғни екінші рет отбасы құрған адамға тағы да ажырасу аса қиынға соқпайды. Ол адам алда не күтіп тұрғанын біледі және ажырасудан қорықпайды. Жалпы бүгінде ер адам, әйел адам болсын жалғыздықтан қорықпайтын болып барады", - дейді Жанат Смирнова.

Психолог ажырасудың алдын алу мақсатында бірінші кезекте ерлі-зайыптының ортақ мақсат-мүддесі болуы керегін айтады. Ол тек бала тәрбиелеп, демалыс күндері киноға бару ғана емес, ортақ бизнес ашу, үй салу сияқты ортақ мүдделер дейді психолог.