Нұр-Сұлтанда коронавирус жұқтыру дерегі қаншалықты азайды?

Нұр-Сұлтан қаласы қоғамдық денсаулық сақтау басқармасы басшысы Тимур Мұратов елордада коронавирус жұқтыру саны айтарлықтай қысқарғанын айтты, - деп хабарлайды Tengrinews.kz тілшісі.

"Қала тұрғындарынан түскен өтініштердің жалпы саны тәулігіне 3 мыңнан 1 мыңға дейін төмендеді. Коронавирус бойынша шақырулар тәулігіне 500-ден 6-ға дейін азайды", - деді Мұратов елорда әкімдігінде өткен баспасөз мәслихатында.

Сондай-ақ, ол 5 шілдеден бастап ауруханаға жатқызылған науқастардың саны 4 мыңнан 343 адамға немесе 10 есе азайғанын мәлімдеді.

"Ал төсек қорының жүктемесі 99 пайыздан 17,2 пайызға дейін азайды. Стационарлардағы коронавирус расталып, ауруханаға жатқызылған науқастар саны 2000-нан 137-ге дейін (14 есе), пневмониямен ауырғандар саны 1333-тен 198-ге дейін (7 есе) азайды", - деді ол.

Айта кетейік, Нұр-Сұлтанда 13 578 адам коронавирус жұқтырды. 10 224 науқас жазылды, 267 адам қайтыс болды.

Қазақстанда COVID-19 жұқтырғандар саны 103 033-ке жетті. 82 777 науқас айықты, 1 269 адам аурудан көз жұмды.

Қазақстан жаңалықтары. Соңғы жаңалықтар. Telegram желісінде бізге жазыл!