Коронавирус: Нұр-Сұлтанда қанша адам тест тапсырған?

Елордада 15 528 тұрғын экспресс-тестілеуден өтті. Бұл туралы Нұр-Сұлтан қаласы әкімінің орынбасары Бахтияр Мәкен айтты, деп хабарлайды Tengrinews.kz тілшісі.

Оның айтуынша, шаһарда коронавирус инфекциясын жұқтырудың 599 дерегі тіркелген, 9 пайыз өсім бар. 

"332 науқас стационарда жатыр. 214 адам емделіп шықты, үйдегі карантинде 2 576 адам бар. Өкінішке қарай, індеттен 3 адам қайтыс болды", - деді ол орталық коммуникациялар қызметінде өткен баспасөз мәслихатында.

Бахтияр Мәкен 9 сәуірден бастап, коронавирусты анықтау бойынша тестілеу басталғанын жеткізді.

"Қазіргі таңда жалпы 29680 зертханалық жұмыс жүргізілді. 9 сәуірден бастап, 15 528 адам экспресс-тестілеуден өтті. Қазіргі уақытта 10 науқастың жағдайы тұрақты ауыр. Оның ішінде 5 науқас жасанды тыныс алу аппаратына қосылған", - деді қала әкімінің орынбасары.

Айта кетейік, кеше мемлекет басшысы Қасым-Жомарт Тоқаев елімізде төтенше жағдай режимі ұзаратынын мәлімдеді.